Աշխատանքային սխալներ, որ թույլ եք տալիս ամեն օր. tert.am

Արդյոք ձեզ դո՞ւր է գալիս ձեր աշխատանքը։ Արդյո՞ք այն ձեզ համար արժեքավոր է կամ հաճույք ստանո՞ւմ եք այդ աշխատանքից։ Կարո՞ղ է այն, ինչով դուք սիրում եք զբաղվել, օգտակար լինել նաև ձեր աշխատավայրի համար..։

Միանգամայն հնարավոր է, որ այս հարցերին դուք պատասխանեք «ոչ», իսկ դա նշանակում է, որ պետք է վերաիմաստավորել աշխատավայրին և աշխատանքին ձեր վերաբերմունքը, գրում է Forbes.ru-ն։

Դուք լիովին չեք պատկերացնում ընկերության նպատակները: Յուրաքանչյուր աշխատակից պետք է հասկանա, թե որոնք են իր ընկերության հիմնական նպատակները։ Եթե նույնիսկ այդ մասին ձեզ չեն ասել, չի նշանակում, որ դրա մասին չպետք է մտածեք կամ ինքներդ ձեզ համար պատկերացնեք՝ ինչ նպատակներ ունի ձեր գործատուն։ Պետք չէ անվերապահորեն անել այն, ինչ ձեզ ասում են։ Փորձեք վերլուծել ցանկացած հրահանգ կամ առաջադրանք։

Ձեզ թվում է, թե ձեր դերն ընկերությունում կարևոր չէ: Փորձեք պատասխանել այս հարցին՝ «Եթե ինձ վաղն աշխատանքից հեռացնեն, արդյո՞ք ընկերության աշխատանքը կվատթարանա»։ Փորձեք լինել անկեղծ ինքներդ ձեզ հետ։ Եթե դուք պատասխանել եք «ոչ», ուրեմն շատ հնարավոր է, որ մի օր ձեզ կհեռացնեն աշխատանքից։ Գուցե դուք ամբողջությամբ չեք տրվում աշխատանքին կամ էլ զբաղվում եք մի բանով, որին լավագույնս չեք տիրապետում։ Սակայն, չէ՞ որ շատ կարևոր է միշտ իմանալ, որ դուք ճիշտ տեղում եք և պատասխանատու եք կատարած աշխատանքի համար։

Դուք ընկեր չունեք աշխատավայրում: Մի շարք ուսումնասիրություններ ցույց են տվել, որ մարդիկ ավելի երջանիկ են լինում, կարողանում են իրենց աշխատատեղը պահպանել և դրական են տրամադրված լինում աշխատավայրում, երբ այնտեղ ընկերներ ունեն։ Gallup ընկերության ուսումնասիրությունը ցույց է տվել, որ մարդկանց շրջանում, ովքեր լավ ընկեր ունեն աշխատավայրում, 7 անգամ ավելի են այն անձինք, ովքեր սիրում են իրենց աշխատանքը։ Չնայած դրան՝գրասենյակային աշխատողների 30%-ը միայն ընկերներ ունի աշխատավայրում։ Փորձեք բացառություն դառնալ և ընկերացեք ձեր աշխատավայրից որևէ մեկի հետ։

Դուք օրինակ չեք վերցնում հաջողակ մարդկանցից: Դուք պարզապես այնպիսին եք, ինչպիսին կաք, սակայն լավ աշխատելու գաղտնիքներից մեկն այն է, որ դուք փորձեք նմանվել հաջողակ մարդկանց, ձեզ պահեք այնպես, ինչպես նրանք, նույնիսկ հագնվեք հաջողակների նման։ Նման կերպ դուք ոչ թե կնմանակեք ինչ-որ մեկին, այլ կկարողանաք գտնել ձեր «ոսկե միջին» «Ես»-ը։

Դուք բավականաչափ չեք հանգստանում: Ընկերության համար մեծ խնդիր կարող են լինել «նստած մեռյալները»՝ ուժասպառ աշխատակիցները, ովքեր աշխատում են՝ ներդնելով իրենց ամենավերջին ուժերը։ Forbes USA-ի հեղինակ Ջեյսոն Նազարը գտնում է, որ ավելի լավ կլինի գրասենյակային աշխատանքն այնպես կազմակերպել, որ աշխատակիցները կարողանան հանգստանալ որքան իրենց անհրաժեշտ է։ Ուժերը սպառած աշխատակիցները լավ չեն հանգստանում և «վարակում» են մյուսներին, արդյունքում ստացվում է գրասենյակ, որը լի է աննպատակ թափառող աշխատակիցներով։

Դուք ձեզ դնում եք նեղ շրջանակների մեջ: Մի՛ վախեցեք երազելուց, կան ղեկավարներ, ովքեր կարող են ասել, թե իրենց աշխատակիցները ոչ մի բանի չեն կարողանում հասնել և որքան անհաջողակ են նրանք։ Այդ մտածողությունն ազդում է աշխատակիցների վրա, և նրանք ևս սկսում են այդպես մտածել։ Սակայն, ուշադրություն մի՛ դարձրեք դրան, և մի՛ դրեք ձեզ ուրիշի պատկերացումների նեղ շրջանակների մեջ։ Աճեք ամեն օր։ Ձեր ներուժի միակ սահմանափակումը ձեր սեփական երևակայությունն ու ուժերն են։

Դուք մոռանում եք հաճախորդի մասին: Այդ մարդիկ ո՛չ պակաս կարևոր են, քան ձեր երեխաները, ամուսինները, եղբայրներն ու քույրերը, քանի որ նրանք իրենց դժվարությամբ աշխատած գումարը և ժամանակը ծախսում են ձեր ապրանքների և ծառայությունների վրա։ Ձեր աշխատանքի ո՞ր մասում եք դուք շփվում ձեր հաճախորդի հետ, գիտե՞ք ինչ են նրանք մտածում։ Ընկերությունները, որոնք հեռանում են իրենց հաճախորդներից՝ վերանում են ժամանակի ընթացքում։ Forbes USA-ի հեղինակ Ջեյսոն Նազարը խորհուրդ է տալիս կարդալ Տոնի Շեյի «Երջանկություն պարգևելով։ Զրոյից մինչև միլիարդ» գիրքը:

Դուք ձեզ այնպես չեք պահում, ինչպես բնորոշ է ղեկավարին: Եթե դուք ղեկավարեք ընկերությունը, ինչպե՞ս ձեզ կպահեք։ Այդ մտածողությունը կօգնի ավելի շուտ կենտրոնանալ և ավելի լավ աշխատել։

Ձեզ թվում է, որ ձեր աշխատանքը ոչ-ոք չի գնահատում: Մարդիկ միշտ քննարկում են, թե ինչպես եք աշխատում այլ աշխատողների համեմատ։ Ձեզ չի հաջողվի խաբել և ձևացնել, որ լավ եք աշխատում, քանի որ բոլորն ամեն ինչից քաջատեղյակ են։ Եթե ձեզ վերջին ժամանակներում ոչ-ոք քննադատության չի ենթարկում, դեռ չի նշանակում, որ դուք հիանալի կերպով եք աշխատում։ Ձեր չափանիշները պետք է ավելի բարձր լինեն ուրիշների չափանիշներից։ Ամեն օր գնահատեք ձեր աշխատանքը և փորձեք կռահել, թե ինչ են մտածում ուրիշները։

Դուք դուր չեք գալիս ձեր գործընկերներին: Կատարյալ գրասենյակային աշխարհում մարդկանց միայն կգնահատեին իրենց արժանիքների և կատարած աշխատանքի համար։ Սակայն մենք սոցիալական արարածներ ենք, և բոլորին հաճելի է աշխատել հաճելի մարդկանց մեջ, որոնց հետ հեշտ է շփվել։ Պատկերացրեք այնպիսի սցենար, երբ ղեկավարը պետք է աշխատանքից հեռացնի երկու հավասար աշխատանքային որակներով աշխատողների, սակայն ընտրությունը կանգնում է ընկերական աշխատակցի և անհավասարակշռված աշխատակցի միջև՝ ո՞ւմ կընտրի ղեկավարությունը։

Հարցեր, պատասխաններ, մեկնաբանություններ